नेपाल पत्रकार महासंघ झापाले सात बुँदे मागसहित जिल्लाका १५ वटै पालिकामा ज्ञापनपत्र बुझाएको छ ।
महासंघ अध्यक्ष एकराज गिरीसहित पदाधिकारी तथा कार्यसमिति सदस्यहरुको टोलीले ज्ञापनपत्र बुझाएको हो ।
महासंघले पालिकामा सञ्चारसम्बन्धी आवश्यक नीति तथा सबै कानुनहरु सञ्चारमैत्री रुपमा निर्माण गरी एक वर्षभित्रमा कार्यान्वयन गर्नुपर्ने माग गरेको छ ।
त्यस्तै, सञ्चारमाध्यमहरुको संरक्षण, सञ्चालन र विकासका लागि स्थानीय सूचना तथा विज्ञापन, लोककल्याणकारी सन्देशमूलक विज्ञापन स्थानीय (जिल्लाभित्रका) सञ्चारमाध्यमलाई उपलब्ध गराउनुपर्ने माग गरिएको छ ।
त्यस्तै, पालिकामा रहेका सबै सञ्चारकर्मीको यसै वर्षबाट वार्षिक नवीकरण हुने गरी स्वास्थ्य बीमा गरिदिनुपर्ने, पत्रकारको सीप, क्षमता विकास तथा मिडिया साक्षरताका लागि पर्याप्त बजेट विनियोजन गरिदिनुपर्ने माग राखिएको छ ।
सञ्चारकर्मीको सामाजिक सुरक्षाका लागि नेपाल पत्रकार महासंघ झापाले स्थापना गरेको पत्रकार सहारा उपचार कोषमा अनुदान सहयोग, पत्रकार महासंघको भौतिक विकास तथा सञ्चार उपकरण खरिदमा आवश्यक सहयोग प्रदान गरिदिनुपर्ने महासंघले माग गरेको छ ।
स्थानीय सरकारका असल अभ्यास तथा विकासका महत्वपूर्ण कामहरु बारे खोजमुलक अध्ययन र लेखनवृत्ति कार्यक्रमका लागि आवश्यक बजेट विनियोजनको मागसहित महासंघले ज्ञापनपत्र बुझाएको छ ।
महासंघले ०८२ जेठको पहिलो र दोस्रो साता पालिकामा ज्ञापनपत्र बुझाएको हो । बिर्तामोड नगरपालिका प्रमुख पवित्रा महतरा प्रसाईं, अर्जुनधारा नगर प्रमुख बलदेवसिंह गोम्देन र उपप्रमुख खड्गमाया पराजुली, मेचीनगर प्रमुख गोपाल बुढाथोकी र उपप्रमुख मीना उप्रेती, भद्रपुर नगर प्रमुख गणेश पोखरेल, कनकाई नगर प्रमुख राजेन्द्र पोखरेल, गौरादहका नगर प्रमुख छत्रपति सुवेदी, दमक नगर कार्यवहाक प्रमुख भिमप्रसाद पौडेल, शिवसताक्षीका नगरप्रमुख मेगाहा थोप्रालाई ज्ञापनपत्र बुझाइएको हो । त्यस्तै गाउँपालिकाहरुमा हल्दिबारी गाउँपालिकाका अध्यक्ष रविन्द्र लिङदेन , बाह्रदशी गाउँपालिकाका अध्यक्ष देविन्द्र चम्लागाईं, बुद्धशान्तिका अध्यक्ष मनोज प्रसाईं, गौरीगञ्ज अध्यक्ष फुलवती राजवंशी, कमलका अध्यक्ष हुकुमसिंह राई, कचनकवलका उपाध्यक्ष नवराज भट्टराई, झापाकी का.वा. अध्यक्ष अञजुदेवी थपलियालाई ज्ञापनपत्र बुझाइएको हो ।
